唔使拆機，點樣洗得乾淨？

點解唔拆機？我哋嘅故事

2016 · 香港

我哋由維修開始

2016 年起，Fixes 維修兵團上門修洗衣機同雪櫃，每部機嘅型號、故障同換過嘅零件，都記入自己嘅系統。

2020 · 東京

創辦人移居日本

2020 年，維修兵團嘅創辦人移居日本，喺東京成立 Fixes Japan 株式会社。原本嘅諗法，係喺日本都做維修。

調查之後

反而喺日本，搵到一套唔拆機嘅洗法

做咗一輪調查，我哋喺日本引入咗一套清洗技術：唔使拆機，都做到拆機清洗大約九成嘅效果。

點解堅持唔拆機？

洗衣機，唔係設計畀人成日拆

入面有密封膠圈、膠扣、避震同一條條喉。拆開再裝返，差少少都可能漏水、有響聲、震得犀利；唔少機拆完洗完，反而出事。所以我哋堅持唔拆機。

帶返香港

技術帶返嚟，變成洗淨兵團

我哋將呢套方法帶返香港，開始上門清洗洗衣機，就係今日嘅洗淨兵團。

今日 · Fixes Japan

日本嗰邊，變咗研發 IT 同 AI

原本去日本諗住做洗衣機，結果倒轉頭幫咗香港。之後 Fixes Japan 專心研發公司嘅 IT 同 AI 系統，帶返嚟香港用，右下角嘅 Fixes Baby 都係。未來，Fixes Japan 會繼續負責 IT 發展。

清洗全過程：19 步

1. 0:00 到場：先講流程，再影型號貼紙

   師傅一到，先同你講今日點做，再影部機擺位、正面、能源標籤同型號貼紙，對返同訂單一樣先開工。

2. 0:10 試機：清洗之前，先試機

   試軸芯、門鎖，用棉質 60°C 試入水高度，再試排水，全部錄低。部機本身有問題，開始之前同你講清楚。

   • 軸芯有冇斷、有冇偏移
   • 門鎖係邊種
   • 棉質 60°C 入水高度
   • 排水正唔正常

3. 0:20 內窺鏡：內膽光鮮，背面先係重災區

   內窺鏡駁住師傅手機，由內膽嘅千眼伸入去，慢慢由 3 點錄到 9 點。背面積咗幾多黑泥，你喺手機一齊睇。

4. 0:25 門膠邊：影低門膠邊，12 點位都要望

   霉多數一圈圈收喺膠邊摺位入面。師傅喺 6 點、3 點、9 點各影一張，睇完先同你講要唔要除霉。

   12 點位有冇穿窿？ 有穿窿，清洗時水氣可能走去面板同電子板，所以入水前先望，見到就停低講清楚。

5. 0:30 高濃度活性氧：60°C 暖水，落高濃度活性氧

   棉質 60°C 入水，水位夠就落活性氧，浸 15 分鐘；部機特別污糟，就浸耐啲。

   有啲型號，要等佢抽完水 一入水會自己抽一抽水。師傅等佢抽完先落粉，免得粉衝入缸底喉頂住氣、排唔到水。

6. 放大睇 · 活性氧係乜：放大到分子：氧，鎖喺晶體入面

   粉狀嘅活性氧，一般係過氧化氫（H₂O₂）同碳酸鈉（梳打）結成嘅晶體。溶落暖水，晶體散開，過氧化氫就放出嚟做嘢。

   過氧化氫（H₂O₂） 兩粒氧手拖手，兩頭各一粒氫，好似打開咗一半嘅書。

7. 原理 · 點樣分解污垢：氧化污垢，鬆開油脂

   黑泥係皮脂、洗衫液同柔順劑渣、棉絮同細菌黐埋嘅一層膜。過氧化氫喺鹼性暖水入面氧化呢啲有機污垢，令佢軟化、斷開；梳打就幫手鬆開油脂、軟化水。

   • H₂O₂ ⇌ H⁺ + HOO⁻：鹼性水入面，小部分變成過氫氧根，幫手氧化污垢同色素
   • 2 H₂O₂ → 2 H₂O + O₂↑：用完分解成水同氧氣，冒出細細粒氣泡

8. 對人體：唔含氯，用完會分解

   活性氧唔係漂白水，冇嗰種刺鼻氯味。過氧化氫用完分解成水同氧氣；梳打溶喺水度，跟住沖走。

   • 濃粉你唔使掂：師傅戴手套、護目鏡落劑
   • 唔超過 70°C：保護部機嘅密封膠圈
   • 沖三次清水：之後建議你空機行兩次，盡量唔留殘留

9. 0:35 梘粉盒：趁浸緊，拆梘粉盒出嚟洗

   撳住按扣，成個梘粉盒拉出嚟，連虹吸蓋都拆開；放梘粉盒嗰個位都要洗。洗之前影一張，洗完再影一張，前後你自己對比。

10. 0:45 發泡促進劑：加發泡促進劑，污糟慢慢浮出嚟

    浸夠 15 分鐘，再落發泡促進劑浸 5 分鐘。泡沫幫水滲入軟化咗嘅污垢，將鬆脫嘅碎屑包住、托起，等陣水槍先沖得走。

    「高濃度活性氧加發泡促進劑浸住，污糟慢慢浮晒出嚟。」

11. 0:50 駁機：駁好水龍頭同高壓清洗機

    高壓清洗機用你屋企水龍頭嘅水：水喉由水龍頭駁去清洗機，再由高壓喉駁去水槍。洗衣機唔使搬，喺原位即場做。

12. 0:55 梘喉 · 水位：沖梘喉，水位守住門膠邊以下

    梘喉由梘粉盒通落外缸，柔順劑同梘渣積耐咗會塞，所以水槍都會沖埋。沖嘅時候，水位一定守住門膠邊以下。

    點解要守住？缸底喉有個浮波 水位一過咗門膠邊，缸底喉接外缸嗰度嘅浮波就會浮起，部機停機報錯；水氣亦可能走去面板同電子板。

13. 1:00 高壓水槍 · 最關鍵：由千眼，沖散背面黑泥

    水槍伸入內膽，貼近千眼噴。黑泥多數積喺下面 4 點至 8 點，因為長年浸住水；上面都會沖，但重點喺下面。特別頑固嗰啲，師傅對準重點擊破。

14. 1:05 沖三次：邊沖邊排水，一次清過一次

    黑泥同污水由外缸底，經缸底喉、排水泵排走。沖三次，每次排出嚟嘅水都清啲。

15. 1:25 複查：內窺鏡再照，未乾淨就再沖

    沖完再用內窺鏡由千眼照入去。仲有污漬就再沖，沖到冇為止；千眼特別細嘅型號，要沖耐啲。

16. 1:30 加選：門膠邊除霉，做唔做由你

    第 4 步影完門膠邊，師傅話你知有幾多霉。揀加選，就用除霉劑處理表面同摺位，多做大約 15 分鐘，前後都影相。

17. 1:55 收工：沖到清水，先收工

    影清水相，排乾水再用內窺鏡錄一次，同清洗前嘅片段對比，背面見返光亮嘅鋼。

    • 清水相
    • 清洗後內窺鏡片段
    • 建議你空機行兩次

18. 價錢：清洗價錢，一早講明

    你部機屬邊類，問 Fixes Baby 即刻知。

    • 一般型號 HK$880：已包上門費，大約兩個鐘
    • 特別型號 HK$1,180：內膽千眼特別細，要浸耐啲、沖耐啲
    • 一年內再洗同一部機 −HK$200：一年內喺我哋洗過
    • 加選 · 門膠邊除霉 +HK$300：多做大約 15 分鐘

    點先算特別型號？

    • 內膽千眼特別細：活性氧由浸 15 分鐘加到 20 至 25 分鐘，沖多過三次
    • 特大容量或者非標準型號：報價專員確認價錢

    唔接清洗 日式洗衣機（結構所限，唔拆機洗唔到）同 Miele。我哋接前置式同上置式。

19. 落單：同 Fixes Baby 傾，就落到單

    講低牌子同型號，或者影張型號貼紙，佢幫你對價錢。正式報價要留電話，我哋喺 WhatsApp 同你約時間。

上門清洗服務只限香港。